A Rana Mai Kamar Ta Yau Neil Papworth, Injiniya mai shekaru 22 da ke aiki a Sema Group Telecoms, ya aika da saƙon rubutu na farko a ranar 3 ga Disamba, 1992.
Ya kasance wani ɓangare na ƙungiyar haɓaka Cibiyar Sabis na Gajerun Saƙo (SMSC) na Vodafone UK, ɗaya daga cikin manyan masu amfani da wayar hannu a Biritaniya a lokacin.
SMSC wani tsarin ‘Software’ ne wanda zai iya adanawa da tura saƙonnin rubutu tsakanin wayoyin hannu da sauran na’urori.
Papworth, ya yi amfani da Kwamfuta ta sirri don aika saƙon rubutu “Merry Christmas” ta hanyar sadarwar Vodafone zuwa wayar Richard Jarvis, Darektan Vodafone.
Jarvis, ya na halartar wani Biki ne a Newbury, Berkshire, inda ya karɓi saƙon na tarihi akan wayarsa ta Orbitel 901, Daga baya Papworth ya ce bai ɗauki wannan a matsayin wani abu mai muhimmanci ba a lokacin, ya na kan aikinsa ne a lokacin da yake gwada tsarin.
Saƙon rubutu na farko gaisuwa ce mai sauƙi kuma ta abokantaka, amma ta nuna farkon sabon zamanin Sadarwa. Duk da haka, an ɗauki ɗan lokaci kafin aika saƙon ya zama sananne kuma ya yaɗu.
Ɗaya daga cikin dalilan shi ne, Wayar Salula a wancan lokacin ba za su iya aika saƙonnin Text ba, sai dai kawai su karɓa. Sai a shekarar 1993 ne Nokia ta ɓullo da wayar ta farko mai saƙon SMS, Nokia 2010. Ta na da “Beep” na musamman don siginar saƙon da ke shigowa da kuma iyakacin haruffa 160 saboda ƙarancin ‘Bandwidth.’
Wani dalili kuma shi ne, tun farko dai aika saƙon ya na da tsada kuma ba a samu a ko’ina. Dole ne masu amfani su biya kowane saƙo kuma su na iya rubutu a cikin hanyar sadarwa ɗaya kawai. Sai a shekarar 1999 ne hanyoyin sadarwar wayar suka ba masu amfani da ita damar yin rubutu a cikin kamfanoni masu gasa da juna. Wannan ya ƙara samun dama da samun damar aika saƙonnin rubutu.
